Orð og athafnir fara ekki alltaf saman

Mikilvægi tónlistarmenntunar er óumdeilt. Allt nám er fjárfesting og á aldrei að tala um útgjöld í því sambandi. Einn af hornsteinum jafnaðarstefnunnar er jafnrétti til náms og þá ekki síður tónlistarnáms. Það eru grundvallar réttindi allra barna að fá tækifæri til að stunda nám í tónlist óháð stétt og stöðu og því þarf að búa svo um hnútana að knappur fjárhagur komi ekki í veg fyrir að börn læri á hljóðfæri. Því þarf að lækka kostnað við tónlistarnám og fjölga tónlistarkennurum í Kópavogi.

Í því sambandi verður áhersla Samfylkingarinnar á komandi kjörtímabili að efla tónlistarnám í grunnskólum Kópavogs enn frekar og bjóða upp á ókeypis forskólanám fyrir alla sem þess óska. Það er mikilvægt að veita auknu fé til Tónlistarskóla Kópavogs í því markmiði að draga úr biðlistum, en eins og staðan er í Kópavogi er allt að 5 ára bið eftir hljóðfæranámi sem er með öllu óásættanlegt. Með einsetningu grunnskólanna stunda börnin hefðbundið tónlistarnám síðdegis og því er mikilvægt að færa tónlistarnám yngstu barnanna að sem mestu leyti inn fyrir veggi grunnskólanna. Þá ekki einungis forskólanámið heldur hið hefðbundna tónlistarnám. Varðandi samning Sameinuðu þjónanna um réttindi barnsins og aðalnámsskrá tónlistarskóla munu jafnaðarmenn í Kópavogi vissulega standa vörð um þá yfirlýsingu nú sem fyrr með því að hrinda ofangreindum markmiðum í framkvæmd.

Þetta sagði einn af forystumönnum Samfylkingarinnar í aðdraganda kosninganna 2006. Síðan kom að vísu efnahagskreppa en kannski hefur tónlistarnámi verið haldið í meira fjársvelti en öðru námi, svo ekki sé talað um íþróttir og hestamennsku. Nú er Samfylkingin í meirihlutasamstarfi í bæjarstjórn Kópavogs en ekki er að sjá að auka eigi möguleika á tónlistarnámi nema síður sé. Stundum fara orð og athafnir ekki saman, því miður.

Athugasemdir

[Jón Atli Kristjánsson, 28.9.2011 kl. 16:47]

Sæll félagi, þetta er góður pistill frá þér og orð í tíma töluð. Beinskeytt skrif og málefnaleg. Ef meirihlutinn í Kópavogi bregst við áskorun þinni, verða þau menn að meiri.